Sura ya kwanza ya Matendo ya Mitume ni msingi wa kuelewa historia ya Kanisa la kwanza. Inaelezea kipindi cha mpito kutoka kwa huduma ya Yesu duniani hadi kwa kazi ya mitume, ikiwemo ahadi ya Roho Mtakatifu, agizo kuu la Yesu, kupaa kwake mbinguni, na uteuzi wa mtume mwingine kuchukua nafasi ya Yuda Iskariote.
Mstari 1–3: Utangulizi wa Luka
- Luka, mwandishi wa kitabu, anamwandikia Theofilo na kurejelea kitabu chake cha kwanza (Injili ya Luka).
- Anaelezea jinsi Yesu alivyoonyesha kuwa yu hai baada ya mateso kwa ushahidi mwingi na kuwafundisha wanafunzi wake kwa siku 40 juu ya Ufalme wa Mungu.
Yesu hakuwa tu ameonyesha kuwa alifufuka, bali alithibitisha kwa njia ambazo haziwezi kupingwa. Siku 40 zilikuwa za kuwaimarisha wanafunzi na kuwaandaa kwa kazi itakayofuata. Unaona wazi kwamba Yesu alikuwa na mipango mikakati
Mstari 4–5: Ahadi ya Roho Mtakatifu
- Yesu anawataka wasiondoke Yerusalemu bali wasubiri ahadi ya Baba – yaani, Roho Mtakatifu.
- Anawaambia kwamba watajazwa Roho Mtakatifu si muda mrefu kuanzia wakati huo.
Roho Mtakatifu ni muhimu kwa kazi ya kimisionari ya Kanisa. Wanafunzi walihitaji uwezo wa kutoka juu ili kuwa mashahidi wa kweli
Mstari 6–8: Agizo Kuu la Yesu
- Wanafunzi walidhani Yesu angeurudisha Ufalme wa Israeli wakati huo, lakini Yesu anawaambia si juu yao kujua nyakati.
- Badala yake, anawaelekeza kwenye kazi yao kuu: kuwa mashahidi kuanzia Yerusalemu hadi mwisho wa dunia.
Hapa tunaona kwamba mpango wa Mungu unazidi matarajio ya kibinadamu. Ufalme wa Mungu haukuja kwa njia ya kisiasa, bali kwa ushuhuda wa kiroho na upanuzi wa injili
Mstari 9–11: Kupaa kwa Yesu Mbinguni
- Yesu anapaa mbinguni mbele ya macho yao.
- Malaika wawili wanawatokea wanafunzi na kuwaambia kuwa Yesu atarudi kwa namna ileile alivyopaa.
Kupaa kwa Yesu kunaonyesha utukufu wake na mwisho wa huduma yake ya kimwili duniani. Ahadi ya kurudi kwake inawatia moyo wanafunzi na kizazi chote cha waumini.
Mstari 12–14: Wanafunzi Warudi Yerusalemu
- Wanafunzi warudi katika chumba cha juu wakisubiri.
- Walikuwa na umoja katika maombi, pamoja na Maria mama wa Yesu na wengine.
Umoja na maombi ni msingi wa uamsho wa kiroho. Kabla ya kazi kubwa ya kuhubiri kuanza, wanafunzi waliungana katika kutafuta uso wa Mungu.
Mstari 15–26: Uchaguzi wa Mtume Badala ya Yuda
- Petro anaongoza uteuzi wa mtume mwingine baada ya Yuda Iskariote kujinyonga.
- Wanapiga kura kati ya watu wawili: Yusufu Barsaba na Mathia – na Mathia anachaguliwa.
Kanisa la kwanza liliamini kuwa ni muhimu kuweka idadi ya mitume 12 kamili. Walitegemea maombi na uongozi wa Mungu hata katika maamuzi ya uongozi. Hii inaonyesha mwanzo wa mpangilio wa utawala wa kiroho.
Mambo Muhimu ya Kujifunza
- Ahadi ya Roho Mtakatifu: Roho Mtakatifu ni chanzo cha nguvu ya kushuhudia.
- Uongozi wa Mungu: Yesu alipaa, lakini hakuwacha wanafunzi wake bila mwongozo. Roho Mtakatifu ndiye kiongozi halisi wa Kanisa.
- Maombi na Umoja: Kabla ya mafanikio ya kimisionari, Kanisa lilijikita katika maombi na ushirika.
- Kurudi kwa Yesu: Ahadi ya kurudi kwake ni moyo wa matumaini ya Kikristo. Yesu atarudi tena hivyo tujiandae
- Utawala na Mpangilio wa Kiroho: Kanisa halikuwa harakati ya kiholela, bali kulikuwa na utaratibu na uongozi ulioongozwa na Mungu.
Pastor Aloyce